Hvernig panta ég skoðun á gæðastjórnunarkerfi?

Á heimasíðu Frumherja, undir gæðastjórnunarkerfi er hlekkurinn Panta skoðun.  Ýtt er á hlekkinn og við það opnast vefbeiðnasíða. Þú skráir þær upplýsingar sem beðið er um og ýtir á „senda beiðni“.

Ef um skjalaskoðun er að ræða og kerfið er á rafrænu formi þá er hægt að senda gæðakerfið sem viðhengi með beiðninni t.d. á pdf, zip eða rar formi. Ekki þarf að senda kerfið sem viðhengi þegar beðið er um virkniskoðun þar sem fagaðilinn (hönnuður, byggingarstjóri, iðnmeistari) þarf að vera viðstaddur skoðunina. Haft verður samband við fagaðilann varðandi heppilegan úttektartíma í virkniskoðun. 

Hvernig fer skjalaskoðun og virkniskoðun fram og þarf ég að vera viðstaddur/viðstödd?

Skjalaskoðun fer fram án þess að fagaðili (hönnuður, byggingarstjóri, iðnmeistari) sé viðstaddur. Skoðunarmaður skoðar hvort kerfið er tilbúið til að taka á móti þeim gögnum sem farið er fram á og sendir að því loknu skýrslu í tölvupósti til fagaðila og Húsnæðis- og mannvirkjastofnunar (HMS).

Virkniskoðun fer fram að viðstöddum fagaðila. Eftir að beiðni um skoðun berst hefur skoðunarmaður samband við fagaðila og gefur honum tíma í skoðun. Virkniskoðun fer yfirleitt fram í gegnum fjarfundarbúnaðinn MS Teams og fagaðili fær sent fundarboð með hlekk sem hann opnar á tilsettum fundartíma.

Hver er munurinn á skjalaskoðun og virkniskoðun?

Í skjalaskoðun er verið að kanna hvort kerfið sé tilbúið til að taka á móti gögnum sem krafa er um að séu vistaðar, hvort búið sé að skrá þær verklýsingar í kerfið sem farið er fram á og hvort vísað sé á rétt fyrirmæli s.s. lög um mannvirki, byggingareglugerð, leiðbeiningar við byggingarreglugerð og skoðunarhandbækur gæðastjórnunarkerfa fyrir viðeigandi fagssvið (byggingarstjóri, hönnuður, iðnmeistari)

Við virkniskoðun er farið yfir hvort gæðastjórnunarkerfið hafi verið notað á þann hátt sem  krafist er, gögn hafi verið vistuð, eigið innra eftirlit hafi farið fram o.s.frv.

Hvernig undirbý ég mig fyrir skoðun

Við undirbúning skoðunar er gott að hafa til hliðsjónar skoðunarhandbækur og leiðbeiningar vegna gæðastjórnunarkerfa ásamt skoðunarskýrslu. Þessi gögn má finna undir hverju fagsviði inni á heimasíðu HMS.

Skoðunarskýrsla, sem einnig er að finna á sama stað, er jafnframt gátlisti sem skoðunarmaður notar við skjala- og virkniskoðun gæðastjórnunarkerfisins. Ef skýrslan er notuð við eigin yfirferð kerfisins áður en til skoðunar kemur þá ætti hún að leiða fagaðilann áfram við undirbúninginn og minnka þannig möguleikann á athugasemdum við skoðunina.

Hvað gerist ef ég fæ athugasemdir við skoðun?

Ef gerðar eru athugasemdir við skoðun, þá þarf fagaðili ýmist að senda úrbótaskýrslu nr. 9.060 í gegnum Mínar síður hjá HMS eða fá endurskoðun á kerfið og fer það eftir fjölda athugasemda og alvarleika þeirra, sjá nánar í verklagsreglu HMS nr. 9.007, kafla 5. 

Hver greiðir fyrir skoðunina?

Svar: Fagaðili (eða fyrirtæki hans eftir atvikum) greiðir fyrir skoðun og fyrir endurskoðun á gæðastjórnunarkerfinu ef til þess kemur.

Hvað kostar skoðunin?

Skjalaskoðun kostar kr. 33.500 m.vsk.  Virkniskoðun er á tímagjaldi. Algengt verð er um kr. 40-50.000.

 

2021-10-26 22:32:52